ДАР СОЛИ 2008 ТИБҚИ КВОТА 550 НАФАР ДУХТАРОН ДОНИШҶӮ ШУДАНД

Душанбе, 14 январ. (АМИТ «Ховар», Фарангис Рахимова). — Айни замон дар мансабҳои гуногуни давлатии ҷумҳурӣ 16 236 нафар фаъолият мекунанд, ки аз онҳо 3 915 нафарашон занҳо мебошанд ва ин 24,1 фисадро ташкил медиҳад. Аз теъдоди умумии 700 нафар сардухтурони беморхонаҳо 217 нафарашон зaнҳо мебошанд. Аз 36 364 нафар роҳбарони хоҷагиҳои деҳқонӣ  2 000 нафарашро занон ташкил медиҳанд, зикр намуд дар нишасти матбуотии Кумитаи кор бо занон ва оилаи назди ҳукумати ҷумҳурии Тоҷикистон оид ба фаъолияти ҷамъбасти соли 2008, раиси ин Кумита Хайринисо Юсуфӣ. Дар соли таҳсили 2008-2009 аз шумораи умумии 1007 нафар, ки тибқи квотаи Президентй ба макотиби олии ҷумҳурӣ дохил гардиданд, 550 нафарашон духтарон мебошанд. Дар соли таҳсили 2007-2008 дар муассисаҳои таҳсилоти олии хориҷи кишвар,  аз ҷумла Ҷумҳурии халқии Хитой 23 нафар, Федератсияи Русия 7 нафар, Ҷумҳурии Қазоқистон 5 нафар ва ҷумҳурии Иломии Эрон 11 нафар духтарони тоҷик таҳсили худро идома медиҳанд, зикр гардид зимни нишасти матбуотӣ.           «Бо мақсади андешидани тадбирҳо барои тайёр кардани мутахассисон аз рӯи ихтисосҳои камназир мутобиқи маълумоти Вазорати рушди иқтисод ва савдо дар соли хониши 2008-2009 тибқи квотаи Президентӣ аз рӯи ихтисосҳои менеҷмент 6 нафар, ҳисобу информатика 16 нафар ва муҳандис 3 нафар духтарон ба мактабҳои олии кишвар ва Донишкадаи энергетикии шаҳри Маскав 2 нафар духтарон дохил шудаанд. Дар баробари дастовардҳо дар ҳаёти бонувон  чунин камбудиҳо  ба назар мерасад,  дар шаҳру ноҳияҳои ҷумҳурӣ нокифоягии ҷойҳои кории доимӣ, баxycyc барои занони деҳоти кӯҳистони дурдаст, солҳои охир аз рӯи маълумотҳои оморӣ ҷудошавии оилаҳои нав6унёд, бахусус дар ноҳияҳои Рашт, Рудакӣ ва Ваҳдат бештар ба назар мерасад, ки сабаби асосии он хушунати хонаводагӣ, набудани манзил, муҳоҷирати меҳнатии мардон ва занон мебошад», афзуд Х. Юсуфӣ.