ДАР ТЕҲРОН МАСЪАЛАИ ГУСТАРИШИ ЗАБОНИ ФОРСӢ БАРРАСӢ МЕШАВАД

                                                                   Душанбе, 14 январ.(АМИТ «Ховар», Марзия Саидова).-  14 январ дар Теҳрон 6-умин Анҷумани устодони забон ва адабиёти форсӣ оғоз меёбад. Дар он дар қатори намояндагони 50 давлати ҷаҳон беш аз 10 нафар устодони забон ва адабиёти форсӣ аз Тоҷикистон иштирок менамоянд.        Дар робита дар Душанбе вохӯрии Сафири Ҷумҳурии Исломии Эрон дар Ҷумҳурии Тоҷикистон Алиасғар Амир Шеърдӯст бо ҳайати устодон ва олимони тоҷик баргузор гардид, ки дар он масъалаҳои тақвияти ҳамкории илмию фарҳангии байни ду кишвари ҳамзабон баррасӣ гардид. Дипломати эронӣ иштироки устодони тоҷикро дар Анҷумани мазкур падидаи неке дар густариши робитаҳои илмию фарҳангии ҳар ду давлат арзёбӣ кард.        Бояд зикр кард, ки Анҷуман муддати ду рӯз идома ёфта,  дар он масъалаҳои марбут ба рушду такомули забон ва адабиёти форсӣ ва проблемаҳои вобаста ба он баррасӣ мегараданд.       Анҷуман бо ибтикори бунёди эроншиносӣ ва Созмони фарҳангӣ ва иртибототи исломии Эрон баргузор гардида, дар он аз кишварҳои Осиёву Аврупо намояндагон иштирок менамоянд.       Бояд зикр кард, ки дар миқёси ҷаҳон қариб 150 миллион нафар бо забони форсӣ муошират менамоянд.          Мавриди зикр аст, ки 5-умин Анҷумани устодони забон ва адабиёти форсӣ соли гузашта дар шаҳри Душанбе баргузор гардида буд, ки дар он намояндагони кишварҳои форсизабони минтақа ширкат доштанд.