ДАР ЁВОН МУСОФИРИ ТАКСИРО БО МАВОДИ НАШЪАДОР ДАСТГИР КАРДАНД

Душанбе, 16 январ. (АМИТ «Ховар», Мавҷуда Давлатзода).- Кормандони Шӯъбаи корҳои дохилии ноҳияи Ёвони вилояти Хатлон мошини тамғаи «Опел-Вектра», ки онро Сафарбек Кабирови 27-сола идора мекард, боздошт намуданд. Аз маркази матбуоти Вазорати корҳои дохилии Ҷумҳурии Тоҷикистон ба мухбири АМИТ «Ховар» хабар доданд, ки ҳангоми азназаргузаронӣ аз мусофири мошин Мусо Ҷумаъев, ки пеш бо моддаи 243, қисми 3-и КҶ ҶТ доғи судӣ доштааст, зиёда аз 2 килограмм маводи нашъадори «героин» мусодира гардид. Оид ба ин ҳодиса парвандаи ҷиноӣ боз гардида, тафтиш идома дорад.