ДИРЕКТОРИ «НУРИ ОЛЛОҲ» МАБЛАҒИ «АГРОИНВЕСТБОНК»-РО ТАСАРРУФ КАРД

Душанбе, 12 январ. (АМИТ «Ховар», Мавҷуда Давлатзода).- Директори КДММ «Нури оллоҳ» Ҳабиба Хайруллоева ва шаҳрванд Ҳамидулло Алишеров барои тасарруф намудани маблағи 276954 доллари ИМА дастгир гардиданд.Маълум гардид, ки Ҳабиба Хайруллоева аз соли 2005 то ин ҷониб вазифаи директори корхонаи мазкурро ба ӯҳда дошта, бо шаҳрванд Ҳамидулло Алишеров забон як карда, 2-юми июли соли 2006 тибқи шартномаи кредитӣ аз ҶСК «Агроинвестбонк»-и шаҳри Душанбе бо мақсади хариди молҳои ниёзи мардум ба маблағи 200 ҳазор доллари ИМА бо 24%-и солона ба мӯҳлати то 03 октябри соли 2007 қарз гирифтааст. Номбурда қисме аз ин кредити гирифтаашро барои  эҳтиёҷоти шахсӣ сарф намуда, қисми дигарашро ба дигар шахсон додааст, ки дар натиҷа маблағи кредитӣ бо ҷамъи фоизҳояш 276954 доллари ИМА-ро ба ҶСК «Агроинвестбонк» барнагардонида ин маблағҳоро тассарруф намудааст.             Аз маркази матбуоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон ба мухбири АМИТ «Ховар» иттилоъ доданд, ки Ҳ. Хайруллоева ва Ҳ. Алишеров тибқи моддаи 246, қисми 3-и Кодекси ҷиноии Ҷумҳурии Тоҷикистон гунаҳгор дониста мешаванд. Нисбати онҳо аз тарафи кормандони Раёсати Агенти дар шаҳри Душанбе аз рӯи маводҳои ҷамъовардашуда санҷиш давом дорад.