ДОНИШИ АКСАРИ МУДАРРИСОН ҶАВОБГӮИ ТАЛАБОТ НЕСТ

Душанбе, 15 январ. (АМИТ «Ховар», Лутфия Эшонқулова).- Дар Донишкадаи давлатии исломии Тоҷикистон  зиёда аз 600 нафар донишҷӯён ба таҳсил фаро гирифта шудаанд, аммо аксари донишҷӯён ба таври худомӯзӣ бо аз худ кардани сабақҳои таълимӣ машғул шуда, мунтазам дар дарсҳо иштирок намекунанд, зикр гардид, зимни нишасти матбуотие, ки дирӯз дар донишгоҳ баргузор шуд. Дар ҳисоботи Вазорати фарҳанги ҶТ дар бораи натиҷаҳои фаъолияташ дар соли 2008, омадааст, ки  сатҳи дониши мударрисон низ, ҷавобгӯи раванди талаботи имрӯза набуда, аксари онҳо дорои дониши ибтидоии динӣ  буда, худомӯз мебошанд ва масъалаҳои мухталифи динӣ ва мазҳабиро дуруст сарфаҳм намераванд.Умуман, —  гуфта шудааст дар ҳисобот, — шиносоӣ бо мадрасаҳои «Шайх Маслиҳатдин»- шаҳри Хуҷанд, «Бӯстон»- и ноҳияи Масчоҳ, «Имоми Аъзам»- и ноҳияи Турсунзода ва ғайра нишон дод, ки на ҳамаи онҳо бо барномаҳои таълимӣ, маводи дарсӣ, синфхонаҳо, шароити мӯътадили дарсиву манзилӣ ва мударрисон пурра таъмин мебошанд.            Вазорати фарҳанг мақсад дорад, ки дар соли 2009 барои расонидани ёрии методӣ ба муассисаҳои таълими динӣ ва назорат бурдани кору фаъолияти онҳо, дар назди шӯъбаҳои фарҳанги шаҳру ноҳияҳо як воҳиди кории мутахассис оид ба муассисаҳои таълими динӣ ташкил намояд.