ИЛМИ МУОСИР ЗИЛЗИЛАРО ПЕШГӮӢ КАРДА НАМЕТАВОНАД

 Душанбе, 10 январ. ( АМИТ «Ховар», Темур Бандишоев).- Шоми дирӯз дар шаҳр ғайричашмдошт овоза паҳн шуд, ки дар қаламрави Тоҷикистон аз соати  1 то 4- и субҳ бояд зилзилаи сахти қувваташ то 9 бал рух диҳад. Аҳолии  қисми зиёди маҳалҳои пойтахт аз ин овоза ба воҳима афтода шабро дар беруни хонаҳояшон гузарониданд. Баъзеҳо исбот карданӣ мешуданд, ки гӯё дар  ин бора  ба воситаи телевизион хабар дода бошанд.         Мухбири АМИТ «Ховар» барои аниқ намудани масъала ба мутахассисони Маркази  зилзилашиносии «Душанбе» муроҷиат кард. Дар он ҷо зикр намуданд, ки хабари мазкур иғвогарии навбатӣ буда, ягон асоси воқеӣ надорад. Тибқи хабари аз маҳалҳо расида, чунин овоза дар байни аҳолии  шаҳру ноҳияҳои дигари мамлакат низ паҳн шудааст. Ёдовар мешавем, ки  бори охирин дар қаламрави Тоҷикистон замин як ҳафта пеш  бо қувваи 5 бал ҷунбида буд.