КОРМАНДОНИ ПАЖӮҲИШГОҲИ АСТРОФИЗИКА ДАР БОРАИ ЗИЛЗИЛА ОВОЗА ПАҲН НАКАРДААНД

            Душанбе, 12 январ. ( АМИТ «Ховар», Людмила Дубинина).- Директори Пажӯҳишгоҳи астрофизикаи Академияи илмҳои ҷумҳурӣ Хурсанд Ибоддинов ба мухбири  АМИТ  «Ховар»  гуфт, ки  кормандонии  пажӯҳишгоҳ ба овозаи шоми 10 январ дар бораи имконияти рух додани зилзилаи шадид ягон муносибат надоранд. Ҳамон шаб дар шаҳри Душанбе ва минтақаҳои дигари ҷумҳурӣ овоза паҳн шуд, ки дар қаламрави мамлакат зилзилаи сахт рух медиҳад. Одамон аз ин овоза ба воҳима афтода, шабро  дар беруни хонаҳояшон рӯз карданд.             Х.Ибоддинов таъкид кард, ки то ҳол дар саросари ҷаҳон ягон усули  пешбинӣ кардани зилзила вуҷуд надорад.            Чанд лаҳза  пеш аз  рух додани зилзила дар табиат баъзе нишонаҳоро  мушоҳида кардан мумкин аст, гуфт олим.- Тағйир ёфтани  ҳаҷми моддаи химиявии радон дар таркиби  ҳаво, тағйирёбии  афканиши шуоъҳои электромагнитӣ дар қабати замин, тағйироти қутби ионҳо, инчунин рафтори баъзе намудҳои ҳайвоноти хонагӣ аз ҳамин ҷумлаанд. Х.Ибоддинов дар хотима зикр намуд, ки ин  усулҳо дар муассисаҳои илмии мамлакатҳои ҷаҳон ҳамаҷониба омӯхта мешаванд.