МӮҲЛАТИ ИҶРОИ БАРНОМА ДАРОЗ КАРДА ШУД

         Душанбе, 8 январ. (АМИТ «Ховар», Людмила Дубинина).- Барномаи беҳтар сохтани вазъияти соҳаи маориф, ки онро Маркази идораи қарзҳо дар ин соҳа амалӣ месозад,  соли 2009 гузаронидани марҳалаи дуюми санҷиши малакаю маҳорат ва дониши талабагони синфҳои чорумро пешбинӣ менамояд.  ТИбқи барнома,имсол дониши талабагон дар 105 мактаби  12 шаҳру ноҳияи ҷумҳурӣ санҷида мешавад. Бояд гуфт,ки ин мактабҳо усули нави маблағгузориро истифода мебаранд. Корманди  Маркази идораи барномаҳои қарзи соҳаи маориф  Парвиз Саидов ба мухбири АМИТ «Ховар»  гуфт, ки  дар санҷиш бештар аз 2300 талаба иштирок хоҳад кард. Илова бар ин бо роҳи сӯҳбат бо роҳбарони мактабҳо, омӯзгорон ва  падару модарон ба вазъияти умумии соҳа баҳо дода хоҳад шуд.        Қайд карда шуд, ки  мувофиқи барнома, соли гузашта дониши 2225 талаба санҷида шуд. Умуман  мӯҳлати иҷрои барномаи беҳтар сохтани вазъияти соҳаи маориф то моҳи июли соли 2010 давом мекунад.