МАҲСУЛОТИ БЕҲТАРИНИ ТОҶИКИСТОН МУАЙЯН КАРДА МЕШАВАД

Душанбе, 19 январ. (АМИТ «Ховар», Бекназари Абӯбакр). – Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон тасмим гирифтааст, ки соли ҷорӣ озмуни «Беҳтарин маҳсулоти Тоҷикистон»-ро доир намояд. Дар ин хусус, зимни нишасти матбуотӣ 19 январ, директори Агентии давлатии «Тоҷикстандарт» Далаталӣ Ҳотамов ба доираи васеи хабарнигорон иттилоъ дод. Ӯ афзуд, ки ҳадафи аслии ташкил намудани ин озмун ба роҳ мондани истеҳсоли маҳсулоти баландсифат ва ба ин васила афзудани ҳаҷми истеҳсолот, ғани гардонидани буҷаи давлат ва ташкили ҷойҳои нави корӣ мебошад. Давлаталӣ Ҳотамов мӯътақид бар он аст, ки дар баробари зиёд шудани истеҳсоли маҳсулоти ватанӣ эҳтиёҷоти кишвар ба воридот низ кам мегардад. Аз ин рӯ, соҳибкоронро зарур аст, ки дар ин озмун фаъолона ширкат намуда, дараҷаи сифатнокии маҳсулоти хешро нишон диҳанд. Озмуни мазкур дар арафаи ҷашни Истиқлолияти давлатии Тоҷикистон – 9 сентябри соли равон ҷамъбаст мегардад.«Агентии «Тоҷикстандарт» омодааст, ки роҷеъ ба масоили сифатнокии маҳсулот, ҳам аз ҷиҳати техникӣ ва ҳам аз ҷиҳати маънавӣ, ба соҳибкорон кӯмак намояд. Инчунин, дар китобхонаи Агентӣ маълумот оид ба 21 ҳазор намуди стандарт маҳфуз аст, ки соҳибкорон метавонанд аз онҳо бемамоният истифода баранд», — гуфт директори Агентии «Тоҷикстандарт».