МАҶЛИСИ ҲАЙАТИ МУШОВАРАИ ПРОКУРАТУРАИ ВИЛОЯТИ ХАТЛОН

           Қӯрғонтеппа,  6  январ. (АМИТ «Ховар»,  Мурод  Сотиев). – Дар  шаҳри  Қӯрғонтеппа  маҷлиси  ҳайати мушовараи  прокуратураи  вилояти  Хатлон  баргузор  гардид. Дар он   муовини  прокурори  генералии  ҷумҳурӣ  Мирзошариф  Шарифов  иштирок  дошт. Дар  маҷлис  натиҷаҳои  фаъолияти  мақомоти  прокуратураи  вилоят  дар соли  2008  ҷамъбаст  карда  шуданд.       Прокурори  вилоят  Фозилҷон  Охунов  зикр  намуд, ки  соли  гузашта барои  пурзӯр  намудани  мубориза  ба  муқобили  ҷинояткорӣ  корҳои  муайян   ба  сомон расонда  шуданд. Инчунин, барои  пешгирии  қонуншиканӣ  тадбирҳои  профилактикӣ андешида  шуданд.  Ф.Охунов фаъолияти  баъзе  муассисаҳоро  дар  соҳаҳои  нақлиёт,  ҳифзи  меҳнат ва  пешгирии   паҳн  гардидани  бемориҳои  сирояткунанда  ҳадафи  танқид қарор   дод.        Қайд  карда  шуд, ки  дар  вилоят  назорати  сифати  молро   дар  бозорҳо  ва  муассисаҳои  савдо  тақвият  додан  зарур  аст. Зеро  қисми  зиёди  молҳои  бозор  ба  талаботи  стандарти  давлатӣ  мувофиқат  намекунад. Ташкилоту  муассисаҳои  дахлдор  бояд  барои   бартараф  сохтани  ин   камбудиҳо  тадбирҳои  зарурӣ  андешанд,  — гуфт  прокурори  вилоят.