МУЛОҚОТ ДАР ВАЗОРАТИ КОРҲОИ ХОРИҶӢ

                      Душанбе, 26 январ. (АМИТ «Ховар», Наргис Бояхмедова). — Вазири корҳои хориҷии Ҷумҳурии Тоҷикистон Ҳамрохон Зарифӣ бо намояндаи махсуси Муншии умумии Созмони Милали Муттаҳид дар Афғонистон Кай Эйде мулоқот кард. Зимни мулоқот масъалаҳои марбут ба рушди муносибатҳои Тоҷикистон ва намояндагии СММ дар Афғонистон дар бобати расондани кӯмак ба Афғонистон барои барқарор сохтани иқтисодиёти он муҳокима карда шуданд. Мусоҳибон роҷеъ ба имкониятҳои ҳамкории самарабахш дар масъалаи таҳкими сулҳу субот дар Афғонистон ва минтақа, тавсиаи муносибатҳо ва равобити иқтисодӣ, энергетикӣ, нақлиётӣ, мубориза ба муқобили маводи нашъадор ва таҳкими сарҳад табодули назар намуданд.                    Кай Эйде зикр кард, ки Созмони милал ҷонибдори муҳайё сохтани шароити зарурӣ барои ҷалби мамлакатҳои ҳамсоя ҷиҳати иштирок дар барномаҳои иқтисодии Афғонистон мебошад. Ҳамрохон Зарифӣ таъкид кард, ки Ҳукумати Тоҷикистон тайёр аст, аз имкониятҳои мавҷуда истифода бурда, дар амалӣ сохтани барномаҳои иқтисодию иҷтимоии Афғонистон саҳм гузорад.