МУЛОҚОТИ РОҲБАРОНИ ҲАЙАТҲОИ ПАРЛУМОНИИ СААД ДАР МАСКАВ

                   Душанбе, 22 январ. (АМИТ «Ховар», Наргис Бояхмедова ). — Роҳбарони ҳайатҳои парлумонии давлатҳои аъзои Созмони аҳдномаи амнияти дастаҷамъӣ дар Ассамблеяи парлумонии Созмони амнияту ҳамкории Аврупо имрӯз дар Маскав мулоқот мекунанд. Ин мулоқоти нахустини онҳо дар масъалаи ҳамоҳанг сохтани фаъолияти сиёсати берунии мақомоти қонунбарори давлатҳои аъзои СААД мебошад.                  Дар мулоқот масъалаҳои рӯзномаи Ассамблеяи парлумонии САҲА муҳокима карда мешавад, ки нимаи дуюми моҳи феврали соли равон дар Вена баргузор мегардад. Иштирокчиёни он вазъияти минтақаи Қафқози шимолӣ, ҷараёни иҷрои Созишномаи Қувваҳои муқаррарии мусаллаҳ дар Аврупо, проблемаҳои марбут ба хариду фурӯши газ ва ғайраро муҳокима хоҳанд кард.