НОМЗАДИИ ЭМОМАЛӢ РАҲМОН БА ВАЗИФАИ ПРЕЗИДЕНТИ КМО

                  Душанбе, 29 январ. (АМИТ «Ховар», Пайрав Назаров).-31-уми январ ҷаласаи кумитаи иҷроияи Кумитаи милиии олимпии Ҷумҳурии Тоҷикистон баргузор мешавад.                 Тавре ба АМИТ «Ховар» дар КМО ҶТ хабар доданд, дар ин ҷаласа масъалаи баргузории Ассамблеяи кулли ҳисоботиву интихоботии Кумитаи миллии олимпӣ баррасӣ хоҳад шуд. Инчунин дар ин ҷаласа номзад ба вазифаи президенти Кумитаи миллии олимпии Ҷумҳурии Тоҷикистон эълон хоҳад гашт.                 Ба гуфтаи Баҳрулло Раҷабалиев, ба ин вазифа аксари созмону федератсияҳои варзишии кишвар президенти мамлакат Эмомалӣ Раҳмонро пешбарӣ кардаанд. Раиси ҷумҳури Тоҷикистон барои номзадӣ ба ин вазифа розигӣ додааст.                 Бар асоси оинномаи Кумитаи миллии олимпӣ, президенти КМО дар Ассамблеяи кулли кумита интихоб хоҳад шуд.                  Бояд тазаккур дод, ки чунин таҷриба дар баъзе кишварҳои ҷаҳон дида мешавад, чунончи сарварони давлатҳои Беларус, Озарбойҷон ва Туркманистон ҳамзамон президентии кумитаҳои миллии олимпии кишварҳои худро бар ӯҳда доранд.