ОПЕРАИ «РӮДАКӢ» ДУБОРА БА САҲНА ГУЗОШТА МЕШАВАД

         Душанбе, 19 январ. (АМИТ «Ховар» Тахмина Ғоибназарова).- Дар Театри академии  давлатии  опера ва балети ба номи Садриддин Айнӣ баъди  намоиши барномаҳои солинавӣ  танаффуси кӯтоҳмуддат эълон карда шуд. Ҳунарпешагони он баъди анҷоми  танаффус  ба машқи операи  «Рӯдакӣ» шурӯъ менамоянд. Операи мазкур дар арафаи иди Наврӯз, 20 март пешкаши тамошобинон гардонида мешавад. Тибқи нақша, таъмири куллии бинои театр ҳам бояд то иди Наврӯз анҷом дода шавад. Операи мазкур  бори аввал соли 1976 ба саҳна гузошта шуда буд. Ҳунарпешагони театр қарор дода буданд, ки онро соли гузашта ба муносибати 1150 — солагии  Абӯабдулло Рӯдакӣ дубора пешкаши тамошобинон гардонанд. Вале намоишномаи мазкур бо сабаби тӯл кашидани тармими бинои театр ба саҳна гузошта нашуд. Директори театр Ҳ.Маҷидов  ба мухбири АМИТ «Ховар» гуфт, ки операи «Рӯдакӣ» муваффақияти калонтарини     кормандони  театр дар соли равон  хоҳад гашт.