ПЕШНИҲОДИ БАРНОМАИ РАЁСАТИ МОЛДАВИЯ ДАР ИДМ

                       Душанбе, 30 январ. (АМИТ «Ховар», Наргис Бояхмедова). — Имрӯз дар пойтахти Белорусия — шаҳри Минск барномаи раёсати Ҷумҳурии Молдавия дар Иттиҳоди Давлатҳои Мустақил муҳокима карда мешавад. Мувофиқи қарори Шӯрои сарони давлатҳо, ки 10 октябри соли 2008 дар Бишкек қабул гардида буд, раёсати Шӯрои сарони давлатҳо, Шӯрои сарони ҳукуматҳо, Шӯрои вазирони корҳои хориҷӣ, Шӯрои иқтисодӣ, Шӯрои намояндагони доимии ваколатдори давлатҳои ИДМ ва Комиссияи масъалаҳои иқтисодии назди Шӯрои иқтисодии ИДМ аз 1 январи соли 2009 сар карда, ба зиммаи Молдавия гузошта мешавад.                     Бо фармони Президенти Ҷумҳурии Молдавия Владимир Воронин Комиссияи миллии таъмини раёсати мамлакат дар ИДМ ташкил карда шуд. Ҳукумат гурӯҳи кориро барои ҳамоҳанг сохтани фаъолияти таъмини раёсати Молдавия дар ИДМ тасдиқ намуд, ки ба он сафири супоришоти махсуси вазорати корҳои хориҷӣ ва ҳамгироии Молдавия бо мамлакатҳои Аврупо Ефим Килар роҳбарӣ мекунад. Дар ин бора ба АМИТ «Ховар» аз дафтари матбуоти Кумитаи иҷроияи ИДМ хабар доданд.