«РӮСТАМ ВА СӮҲРОБ» ЭРОНРО ТАСХИР КАРД

                Душанбе, 31 январ.(АМИТ «Ховар», Марзия Саидова).- Намоишномаи «Рӯстам ва Сӯҳроб»-и Театри давлатии ҷавонони ба номи Маҳмудҷон Воҳидови Ҷумҳурии Тоҷикистон сазовори Шоҳҷоизаи Фестивали ҳунарҳои театрии «Даҳаи Фаҷр» гардид.                Фестивали мазкур аз 24 то 30 январи соли равон дар шаҳри Теҳрон бо ибтикори Вазорати фарҳанг ва иршоди исломии Эрон гузаронида шуда, дар он дар қатори ҳунармандони кишварҳои Халиҷи Форс ҳайати 12 -нафараи ҳунармандони тоҷик таҳти роҳбарии муовини аввали вазири фарҳанги ҷумҳурӣ Миралӣ Достиев иштирок намуданд. Ҳамзамон, ҳунарманди хушсалиқаи Театри давлатии ҷавонон ба номи Маҳмудҷон Воҳидов Қурбони Собир ҷоизаи Фестивали «Даҳаи Фаҷр»-ро барои нақши беҳтарини мардона соҳиб гардид.                Назар ба иттилоъи сардори Маркази матбуоти Вазорати фарҳанги ҷумҳурӣ Гулмаҳмад Давлатов, Фестивали мазкур ҳамасола гузаронида шуда, ҳадафи он рушди санъати театрӣ ва муайян кардани беҳтарин ҳунармандон ва намоишномаҳои театрӣ мебошад. Соли равон ҳунармандони тоҷик дар бахши «миллал»-и Фестивал баромад карданд.