РАҲМОНОВ БА ЭРОН МЕРАВАД

          Душанбе, 6 январ. (АМИТ «Ховар», Марзия Саидова).-  Бо мақсади тақвияти ҳамкориҳо дар бахши маориф 17 январ вазири маорифи Ҷумҳурии Тоҷикистон Абдуҷаббор Раҳмонов бо даъвати вазири улуми Эрон доктор Зоҳидӣ озими Теҳрон мешавад.          Тибқи иттилоъи масъули бахши матбуоти Сафорати Эрон дар Душанбе Алиризо Ороста, вазири маорифи Тоҷикистон зимни сафари 4 -рӯзаи худ ба Эрон бо вазири улуми ин кишвар доктор Зоҳидӣ ва вазири омӯзиш ва парвариши Эрон Али Ахмадӣ дидору мулоқот намуда, масъалаҳои таҳкими ҳамкориҳои мутақобилан судмандро дар бахши маориф байни ду кишвар баррасӣ менамоянд.       Бояд зикр кард, ки дар доираи санадҳои байнидавлатӣ ва тавофуқномаҳои ҳамкории вазоратҳои маорифи ин кишварҳо беш аз 400 нафар донишҷӯёни тоҷик дар донишгоҳҳои Эрон таҳсил менамоянд. Дар Тоҷикистон бошад ҳудуди беш аз 300 нафар донишҷӯ ва аспиранту докторантҳои эронӣ дар бахши гуманитарӣ ба таҳсил фаро гирифта шудаанд.