РОНАНДА АЗ БЕЭҲТИЁТӢ БА ҲАЛОКАТ РАСИД

Душанбе, 9 январ. (АМИТ «Ховар», Мавҷуда Давлатзода).- Дар шаҳри Ваҳдат соати 18-у 30 дақиқа ронандаи мошини тамғаи «ВАЗ-2107» (АО 7955 РТ 01) Ҷумъа Ҷӯраеви 47-сола дар километри 3-юми «Ваҳдат — Симиганҷ» қоидаи ҳаракати роҳро риоя накарда, ба самти муқобили роҳ баромада ба мошини тамғаи «ВАЗ-2107» (ВА 4923 РТ 01), ки ронанда Аҳмад Шамсов идора мекард, бармехӯрад. Аз маркази матбуоти Вазорати корҳои дохилии Ҷумҳурии Тоҷикистон ба мухбири АМИТ «Ховар» хабар доданд, ки дар натиҷаи садама Ҷ. Ҷӯраев дар ҷойи ҳодиса ба ҳалокат мерасад, мусофири ӯ Ҳамидулло Сарангов ва ронандаи мошини дигар А. Шамсов сахт маҷрӯҳ гардида, дар беморхонаи шаҳри Ваҳдат бистарӣ мегарданд.