СӮҲБАТИ ТЕЛЕФОНИИ ЭМОМАЛӢ РАҲМОН ВА НУРСУЛТОН НАЗАРБОЕВ

                                        Президенти Ҷумҳурии Тоҷикистон Эмомалӣ Раҳмон бегоҳии дирӯз бо Президенти Ҷумҳурии Қазоқистон Нурсултон Назарбоев      телефонӣ сӯҳбат кард.          Сарони ҳар ду давлат зимни сӯҳбат роҷеъ ба  вазъияти имрӯзаи  муносибатҳои дӯстонаи Тоҷикистону Қазоқистон ва роҳҳои  равнақу ривоҷи онҳо табодули назар намуданд.        Нурсултон Назарбоев ба Эмомалӣ Раҳмон хабар дод, ки  Қазоқистон  мувофиқи  паймонҳои  дар ҷараёни мулоқоти  дар шаҳри Бишкек баргузоргардидаи сарони давлатҳои  Осиёи Марказӣ қарор додааст ба Тоҷикистон ба маблағи 12 миллион доллари ИМА  кӯмаки хайрия расонад. Бо ин маблағ, аз ҷумла ба Тоҷикистон 29 ҳазор тонна мазут , 9 ҳазор тонна сӯзишвории дизелӣ, 12 ҳазор тонна ғалла ва ғайра фиристода хоҳад шуд.         Президенти Ҷумҳурии Тоҷикистон ба  Нурсултон Назарбоев миннатдорӣ баён карда, ин иқдоми ӯро зуҳуроти нави  муносибатҳои дӯстонаи ҳар ду мамлакат номид.