САРМОЯИ МУСТАҚИМ АФЗОИШ МЕЁБАД

               Душанбе, 28 январ. (АМИТ «Ховар», Бекназари Абӯбакр). — «Дар бобати таҳкими иқтидори иқтисодии кишвар, такмили сиёсати инвеститсионӣ ва ҳарчи бештар ҷалб намудани сармоягузориҳо аҳамияти калон дода мешавад. Ҳоло дар Тоҷикистон 51 лоиҳаи инвеститсионӣ татбиқ шуда истодааст, ки маблағи умумии онҳо 5 миллиарду 200 миллион сомониро ташкил медиҳад», — гуфт зимни нишасти матбуотӣ раиси Кумитаи давлатии сармоягузорӣ ва идораи амволи давлатӣ Фаррух Ҳамралиев.              Ӯ афзуд, ки Ҳукумати Тоҷикистон соли гузашта ҷиҳати маблағгузории 12 лоиҳаи муштараки инвеститсионӣ бо ташкилотҳои молиявии ҷаҳонӣ созишномаҳои навро ба имзо расонид, ки маблағи умумии онҳо 540 миллион сомонӣ буда, 315 миллион сомонии он қарзҳои бебозгашт мебошанд.            Мавриди ёдоварист, ки Президенти кишвар Эмомалӣ Раҳмон дар ҷаласаи ҷамъбастии ҳукумат таъкид кард, ки азхудкунии саривақтии маблағҳои ҷудошуда, иҷрои босифати корҳо дар мӯҳлатҳои муқарраргардида ва идоракунии самараноки раванди татбиқи лоиҳаҳо ҳанӯз пурра таъмин карда намешавад. Аз ин рӯ, ба Кумитаи давлатии сармоягузорӣ ва идораи амволи давлатӣ зарур аст, ки доир ба ҷалби сармояи мустақими дохиливу хориҷӣ ба соҳаҳои афзалиятноки иқтисоди миллӣ чораҳои зарурӣ андешад.              Фаррух Ҳавмралиев мӯътақид бар он аст, ки аз рӯи нишондодҳои шартномаҳо бо ташкилотҳои молиявӣ ва донорҳо соли ҷорӣ ҷалби сармояи мустақим ду маротиба афзуда, ҳавасмандии ширкатҳои хориҷӣ дар татбиқи лоиҳаҳои инвеститсионӣ низ вусъат дода хоҳад шуд.