САРШУМОРИ ЧОРВОИ КАЛОН АФЗОИШ ЁФТААСТ

          Душанбе, 15 январ. (АМИТ «Ховар», Лаззат Диловарзод).- Дар Раёсати чорводории Вазорати кишоварзӣ ба мухбири АМИТ «Ховар» иттилоъ доданд, ки саршумори чорвои калони шохдор дар ҷумҳурӣ сол аз сол зиёд мегардад. То 1-уми декабри соли 2008 дар ҳамаи сохторҳои хоҷагӣ саршумори чорвои калони шохдор ба 1758115 сар расонида шудааст, ки нисбат ба ҳамин давраи соли 2007 ба миқдори 272,1 ҳазор сар ё 18,3 фоиз зиёд аст. Афзоиши саршумори чорвои калони шохдор дар хоҷагиҳои ҷамъиятӣ ба миқдори 55 ҳазору 406 сар, хоҷагиҳои деҳқонӣ (фермерӣ) 97 ҳазору 970 сар ва  аҳолӣ 1млн.604 ҳазору 739 сар ба ҳисоб гирифта шуда бошад ҳам, дар бозорҳои шаҳру навоҳии кишвар нарасидани маҳсулоти чорво ва боло рафтани нархи он ҳис карда мешавад. Аз ин рӯ дар назди ҳамаи шаклҳои хоҷагидории ҷумҳурӣ масъалаи зиёд намудани маҳсулоти чорво дар соли 2009 яке аз масъалаҳои асосӣ боқӣ мемонад.