ШАҲРУ НАВОҲИИ СУҒД БО ҲАМ РАҚОБАТ МЕКУНАНД

Душанбе, 13 январ. (АМИТ «Ховар», Бекназари Абӯбакр). — Бо мақсади рушди иқтисодиёт, ноил шудан ба нишондиҳандаҳои баланди истеҳсолӣ ва иҷрои нақшаҳои барномавӣ раиси вилояти Суғд Қоҳир Расулзода қарореро «Дар бораи гузаронидани озмуни «Шаҳр ё ноҳияи беҳтарин» аз 30.12.08 ба тасвиб расонд. Роҳбари маркази матбуоти раиси вилоят Илҳом Ҷамолов ба мухбири АМИТ «Ховар» иттилоъ дод, ки баргузории озмун на танҳо сатҳи иқтисодиётро тақвият мебахшад, дар баробари ин, сатҳи камбизоатӣ низ паст мегардад. Ба ин восита шароити иҷтимоӣ дар шаҳру навоҳии вилоят беҳтар ва дар маҳалҳо корҳои ободонӣ ҷоннок мегардад, ки он ба ҳифзи муҳити зист низ таъсири мусбии хешро мерасонад. Ин озмун дар қаламрави вилоят моҳҳои январ-декабри соли 2009 ҷамъбаст карда хоҳад шуд.Зикр кардан ба маврид аст, ки дар ин озмун шаҳру ноҳияҳои вилоят аз рӯи 29 номгӯи кору хизматрасонӣ ва фаъолияти пурсамари мақомотҳои маҳалӣ қувваозмоӣ намуда, ба ғолибони озмун барои ҷои аввал 30 ҳазор сомонӣ, ҷои дуюм 20 ҳазор сомонӣ ва ҷои сеюм 10 ҳазор сомонӣ мукофот муқаррар шудааст.