СОҲИБКОР БА ДАВЛАТ БА МАБЛАҒИ 50369 СОМОНӢ ЗАРАРИ МОДДӢ РАСОНИД

           Душанбе, 13 январ. (АМИТ «Ховар», Мавҷуда Давлатзода).- Соҳибкор Муҳсин Раҳмонов аз соли 2001 то моҳи сентябри соли 2008 дар заводи хиштбарории кооперативи истеҳсолии «Хоҷабоқирғон»-и  ноҳияи Б. Ғафурови вилояти Суғд кор карда истода, қасдан, дидаю дониста бо мақсади ғараз, бе қайд дар нозироти андози ноҳияи Б. Ғафуров ба фаъолияти соҳибкории ғайриконунӣ машғул мешавад ва ба маблағи 162529 сомонӣ даромад гирифта, ба давлат ба маблағи 50369 сомонӣ аз ҳисоби соҳибкории ғайриконуниааш зарари моддӣ расонидааст. Аз маркази матбуоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон ба мухбири АМИТ «Ховар» иттилоъ доданд, ки М. Раҳмонов тибқи моддаи 259, қисми 2-и Кодекси ҷиноии Ҷумҳурии Тоҷикистон гунаҳгор дониста мешавад. Нисбати ӯ аз тарафи шӯъбаи тафтишотии Раёсати Агентӣ дар вилояти Суғд парвандаи ҷиноӣ оғоз гардида, тафтиш идома дорад.