СОЛИ 2009: 150 ҲАЗОР ҶОИ НАВИ КОРӢ

Душанбе, 17 январ. (АМИТ «Ховар», Бекназари Абӯбакр). — Вазири меҳнат ва ҳифзи иҷтимоии аҳолии ҷумҳурӣ Шукурҷон Зуҳуров зимни ҳисоботаш дар маҷлиси ҷамъбастии Ҳукумат зикр кард, ки дар соли 2008 барои бо шуғли доимӣ таъмин кардани аҳолии қобили меҳнат 114 ҳазор ҷои нави корӣ дар ҳамаи соҳаҳои хоҷагии халқи ҷумҳурӣ муҳайё карда шуд. Дар соли равон бошад, тибқи иттилои ӯ зиёда аз 150 ҳазор ҷои нави корӣ ташкил карда мешавад. Инчунин, дар ҳисоботи роҳбари Дирексияи  сохтмони  иншооти ҳукуматии Дастгоҳи иҷроияи Президенти Ҷумҳурии Тоҷикистон  Абдусалом Қурбонов дар ин маҷлис қайд гардид, ки шумораи  сохтмончиёне, ки  барои кор дар иншооти он зарур мешаванд, дар соли 2009 ба 7435 нафар мерасад, ки нисбат ба соли 2008-ум 4161 нафар зиёд аст.