ТОҶИКИСТОН ФАЪОЛИЯТИ РАВИЯИ ДИНИИ «САЛАФИЯ»-РО ҒАЙРИҚОНУНӢ ДОНИСТ

Душанбе, 9 январ. (АМИТ «Ховар», Мавҷуда Давлатзода).- 8 январи соли 2009 дар Суди Олии Ҷумҳурии Тоҷикистон таҳти раисии муовини аввали раиси Суди Олӣ Наим Мансуров парвандаи гражданӣ аз рӯи даъвои Прокуратураи генералӣ ба манфиати ҳимояи сохти конститутсионӣ ва амнияти Ҷумҳурии Тоҷикистон баррасӣ гардид.  Аз маркази матбуоти Суди Олии Ҷумҳурии Тоҷикистон ба мухбири АМИТ «Ховар» хабар доданд, ки бо ҳалномаи Суди Олӣ аз 8 январи соли 2009 баҳри таъмини ҳимояи асосҳои сохти конститутсионӣ, амнияти ҷумҳурӣ ва ҳуқуқу манфиатҳои қонунии шаҳрвандон, пешгирии ҳолатҳои барангехтани кинаву адоват, низои миллӣ нажодӣ, маҳалгароӣ, динӣ ва паст задани шаъну эътибори миллӣ, фаъолияти равияи динии «Салафия» ҳамчун ғайриқонуни амалкунанда эътироф карда шуда, фаъолияти он дар қаламрави Ҷумҳурии Тоҷикистон манъ карда шуд.            Ҳамзамон бо ҳалномаи мазкур ба ҳудуди ҷумҳурӣ бо мақсади тарғибу ташвиқи ғояҳои «Салафия» ворид ва паҳн намудани аудиовидеосабтҳо, адабиёт ва варақаҳои он низ манъ карда шуд.