ТОҶИКИСТОНУ ПОКИСТОН САРМОЯГУЗОРОНРО ҲАВАСМАНД МЕГАРДОНАНД

                 Душанбе, 28 январ.(АМИТ «Ховар», Марзия Саидова).- 28 январ палатаи поёнии парлумони Тоҷикистон Созишномаи байни Ҳукумати Ҷумҳурии Тоҷикистон ва Ҳукумати Ҷумҳурии Исломии Покистон оид ба ҳавасмандгардонӣ ва ҳифзи мутақобилаи сармоягузориро тасдиқ намуд.                Зимни баррасии ин масъала Раиси Кумитаи давлатии сармоягузорӣ ва идораи амволи давлатии ҷумҳурӣ Фаррух Ҳамралиев гуфт, ки Созишномаи мазкур 13 майи соли 2004 дар шаҳри Исломобод ба имзо расидааст.                 Ин санад ба принсипҳои асосии ҳуқуқӣ асос ёфта, баҳри тақвияти муносибатҳои дӯстона, тавсеаи ҳамкориҳои иқтисодӣ ва ташкили фазои мусоиди сармоягузорӣ барои сармоягузорони ҳар ду ҷониб мусоидат менамояд. Мувофиқи муқаррароти Созишномаи мазкур тарафҳои аҳдкунанда ӯҳдадор мешаванд, ки сармоягузории тарафи дигарро барои сармоягузорӣ дар ҳудуди худ ҳавасманд намоянд.                  Ҳамчунин, санади мазкур кафолат медиҳад, ки идора, дастгирӣ, истифода, интиқол, бархӯрдорӣ ва эҳтиёҷдории сармогузорон дар қаламрави онҳо аз тарафи сармоягузорони дигар ва инчунин аз тарафи ширкату корхонаҳое, ки дар онҳо чунин сармоягузориҳо ҷой доранд ба чораҳои беасос ё дискриминнатсионӣ гирифтор карда намешаванд.                 Тибқи ин санад ҳар яке аз тарафҳои аҳдкунанда дар қаламрави худ муҳити қонунгузорие, ки тартиби низоми ҳуқуқиро кафолат медиҳад, муҳайё менамоянд.                 Бояд зикр кард, ки тасдиқ гардидани Созишномаи мазкур ба тақвияти ҳамкориҳои иқтисодию тиҷоратии Тоҷикистону Покистон нақши муассир мегузорад. Бахусус барои соҳибкорони тоҷик фазои мусоиди ҳуқуқиро фароҳам меорад. Алҳол байни Тоҷикистону Покистон дар бахши коркарди пӯсту пашм ва маҳсулоти кишоварзӣ ҳамкории самарабахш вуҷуд дорад, ки он дар оянда тавсеа хоҳад ёфт.