ВАРЗИШГАРОНИ ТОҶИК СОЛИ 2008 ДАР МУСОБИҚОТИ БАЙНАЛМИЛАЛӢ 217 МЕДАЛ ОВАРДАНД

            Душанбе, 12 январ. (АМИТ «Ховар», Пайрав Назаров).-Варзишгарони тоҷик соли 2008 дар мусобиқоти ҷаҳониву байналмилалӣ 217 медал, аз ҷумла 57 тилло, 58 нуқра ва 102 биринҷӣ  ба даст оварданд, ки ин нисбат ба соли 2007–ум 37 адад зиёд аст. Ин нуқтаро зимни нашасти  матбуотии солона 12 январ раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Маликшо Неъматов иброз намуд. Ӯ афзуд, ки  дар асоси нақшаи тақвимии соли 2008-ум 100 чорабинии варзишӣ, 75 мусобиқаи ҷумҳуриявӣ ва 25 Чемпионати ҷумҳурӣ дар байни наврасон ва ҷавонон дар марказ ва минтақаҳои ҷумҳурӣ  баргузор гардид, ки дар онҳо зиёда аз 30 ҳазор  нафар ширкат варзиданд.  «Дар соли ҷорӣ аз ҳисоби буҷаи ҷумҳуриявӣ барои гузаронидани ин чорабиниҳо 2,531 850 сомонӣ ҷудо шуд», -гуфт дар хотима М.Неъматов.