ҲАЛОКАТИ ШАШ НАФАР БАР АСАРИ ТАРМА

              Душанбе, 27 феврал. (АМИТ «Ховар», Бекназари Абӯбакр). — Шаш нафар сокинони водии Зарафшон дар наздикии нақби «Истиқлол» дар шоҳроҳи Душанб-Хуҷанд зери тарма монда, ҷони худро аз даст додаанд. Ин ҳодиса субҳи 26-уми феврал рух дод.               Аз Кумитаи ҳолатҳои фавқулода ва мудофиаи гражданӣ ба АМИТ «Ховар» иттилоъ доданд, ки нафарони фавтида дар як мошини Шевролет аз Душанбе ба самти Панҷакент ҳаракат мекардаанд, ки тақрибан то сесад метр аз даромадгоҳи нақби мазкур ногаҳон тарма фурӯ рехта, мошинро ба коми худ кашидааст.               Дар миёни афроди ба ҳалокатрасида панҷ нафар аъзои як оила аз деҳаи Мадовраи ноҳияи Панҷакент, аз ҷумла Наврӯзов Абдухалил, Маҳфузаи Хусрав, Худоёров Абдубасир ва фарзандони мактабхони ӯ Мастонаи Абдубасир ва Насибаи Абдубасир, инчунин як донишҷӯ аз деҳаи Кумарви ноҳияи Айнӣ бо номи Одинаев Фирдавс будаанд.