А. НАСРИДДИНОВ: «ТАРТИБ ДОДАНИ ХАРИТАИ ТОПОГРАФИИ ПОЙТАХТ ЗУРУР АСТ»

                     Душанбе, 18 феврал. (АМИТ «Ховар», Лутфия Эшонқулова). — Кумитаи омори шаҳри Душанбе дар ҳамкорӣ бо Корхонаи воҳиди давлатии аэрогеодезии пойтахт ният доранд, то моҳи маи соли ҷорӣ нақшаҳои схематикиро, ки барои гузаронидани чорабиниии муҳими давлатӣ ба монанди барӯйхатгирии аҳолӣ ва фонди манзил дар соли 2010 зарур аст, тайёр намоянд. Тавре ба АМИТ «Ховар», раиси Кумитаи омори шаҳри Душанбе Асомиддин Насриддинов хабар дод, барои тайёр намудани маводҳои картографӣ ва нақшаҳои схематикӣ аз буҷети пойтахт ба суратҳисоби КВД аэрогеодезии Душанбе маблағи 456126 сомонӣ гузаронида шудааст.                     -Мавриди зикр аст, — қайд намуд А. Насриддинов, ки аз сабаби ба вуҷуд омадани дигаргуниҳои солҳои охир дар бахши сохтмон ва комуникатсия ба ғайр аз нақшаҳои схематикӣ, тартиб додани харитаи топографии шаҳри Душанбе ва ноҳияҳои он низ лозим аст. Барои тайёр намудани чунин харитаҳо бо масштаби 1:5000 ва 1: 10000 маблағи 270281 пешбинӣ шудааст.