АФЗОИШИ ШУМОРАИ БЕКОРОН БАР АСАРИ БӮҲРОНИ ҶАҲОНИИ ИҚТИСОДӢ

                Душанбе, 26 феврал. (АМИТ «Ховар», Наргис Бояхмедова). — 24 феврал дар Женева бахшида ба оқибатҳои бӯҳрони ҷаҳони молиявӣ ва бар асари он афзудани шумораи бекорон дар саросари ҷаҳон мулоқоти байналхалқӣ баргузор гардид. Дар мулоқот бештар аз сад нафар намояндагони ҳукуматҳо, иттифоқҳои касаба ва корфармоёни мамлакатҳои гуногуни ҷаҳон ширкат варзиданд. Дар ҷараёни мулоқот маърӯзаи Созмони байналхалқии меҳнат муҳокима карда шуд.               Дар маърӯза гуфта мешавад, ки дар натиҷаи бӯҳрони ҷаҳонии молиявию иқтисодӣ дар давоми як соли охир қариб 20 миллион нафар бекор монд. Дар байни бекорон шумораи кормандони муассисаҳои молиявӣ хеле зиёданд.               Иштирокчиёни мулоқот тадбирҳоеро баррасӣ намуданд, ки ба бартараф сохтани оқибатҳои бӯҳрони иқтисодӣ дар мамлакатҳои ҷаҳон мусоидат мекунанд. Онҳо ҳукумати мамлакатҳоро даъват карданд, ки барои пешгирии оқибатҳои ногувори бӯҳрон барномаҳои миллӣ тартиб дода, ба мутахассисон касбҳои дигарро омӯхта, шумораи бекоронро то ҳадди имкон кам кунанд.