БАРРАСИИ МАСЪАЛАҲОИ ТАШКИЛИ БОЗОРИ УМУМИИ МЕҲНАТИ МАМЛАКАТҲОИ ИДМ

                     Минск, 7 феврал. АМИТ «Ховар», Наргис Бояхмедова). — 10 феврали соли равон дар шаҳри Минск маҷлиси навбатии намояндагони доимии мамлакатҳои ИДМ дар Кумитаи иҷроияи Иттиҳоди Давлатҳои Мустақил баргузор мегардад. Дар он масъалаи давра ба давра ташкил намудани бозори умумии меҳнат ва танзими муҳоҷирати коргарон дар давлатҳои ИДМ муҳокима карда мешаванд.                     Бунёди бозори умумии меҳнат ҳамчун ҷузъи таркибӣ ва зарурии фазои умумии иқтисодӣ яке аз омилҳои муҳимтарини пешрафти иқтисодиёти давлатҳо буда, ба ҳамоҳанг сохтани ҷараёни ҳамгироии давлатҳои Иттиҳод мусоидат менамояд. Ба ин омилҳои гуногун, аз ҷумла, равобити таърихию фарҳангӣ ва миллии халқҳои мамлакатҳои собиқи шӯравӣ, низоми умумии ҷобаҷогузории нобаробари қувваҳои истеҳсолӣ ва мавҷудияти зуҳуроти муҳоҷирати коргарон дар байни давлатҳои ИДМ кӯмаки калон хоҳад расонд.                    Коршиносон дар Минск нуктаҳои барномаи бунёди бозори умумии меҳнат, дараҷаи мувофиқати онҳоро ба воқеияти имрӯза таҳлил намуда, дар мавриди зарурат ба он тағйироту иловаҳо дохил мекунанд.                    Дар ин бора аз Кумитаи иҷроияи ИДМ ба АМИТ«Ховар» хабар доданд.