БОЗДИДИ САРВАЗИР АЗ НБО НОРАК

                 Душанбе, 2 феврал. (АМИТ «Ховар»). — Сарвазири Ҷумҳурии Тоҷикистон Оқил Оқилов имрӯз ба шаҳри Норак рафта, бо фаъолияти Нерӯгоҳи барқи обии «Норак» шинос гардид.                 Роҳбарият ва мутахассисони нерӯгоҳ ба Сарвазир маълумот доданд, ки бо сабаби камобӣ аз 9 агрегати он се агрегат кор карда, тақрибан 790 мегаватт қувваи барқ истеҳсол мекунад, чор агрегат ба кор омода буда, ду агрегати дигар ба куллӣ тармим карда мешавад.                Баъдан дар маъмурияти нерӯгоҳ таҳти раёсати Сарвазир О.Оқилов бо иштироки роҳбарони ташкилотҳои марбутаи соҳа маҷлиси ситоди корӣ баргузор гардид. Дар он ҳисоботи шахсони масъул дар бораи фаъолияти имрӯзаи нерӯгоҳ шунида шуд. Шахсони мутасаддӣ вазифадор карда шуданд, ки таъмири агрегатҳои нерӯгоҳро ҳар чӣ зудтар анҷом дода, онҳоро ба кор омода созанд. Таъкид карда шуд, ки лоиҳаи тармиму таҷдиди нерӯгоҳро ҳар чӣ зудтар тартиб дода, ба Ҳукумати ҷумҳурӣ пешниҳод карда шавад.                Мухбири АМИТ «Ховар» хабар медиҳад, ки мутахассисони маҳаллӣ ҳамроҳи ҳамкасбони худ аз хориҷи кишвар ду агрегати нерӯгоҳро тармим менамоянд.                                                                                                                                         Муҳаррир — Қудратов А.