ГУМРУКЧИЁН АЗ ТАҶРИБАИ ЯКДИГАР БАРХУРДОР МЕГАРДАНД

                  Душанбе, 16 феврал. (АМИТ «Ховар», Мавджуда Давлатзода).- Кормандони Раёсати минтақавии гумрукӣ дар вилояти Хатлон тайи як моҳи сипаригардида 54 ҳолати ҳуқуқвайронкунии маъмурӣ ва як ҷиноятро ошкор карданд.                  Аз маркази матбуоти Хадамоти гумруки назди Ҳукумати Ҷумҳурии Тоҷикистон ба мухбири АМИТ «Ховар» хабар доданд, ки бобати пешгирӣ ва ошкор намудани ҳодисаҳои ҳукуқвайронкунии гумрукӣ ва гардиши ғайриқонунии маводи мухаддир аз тарафи шӯъбаи мубориза бар зидди ҳуқуқвайронкуниҳои гумрукии раёсат дар дидбонгоҳҳои тобеи он семинарҳои сайёр гузаронида мешаванд. Мақсади асосии гузаронидани семинарҳо ин бархурдор гардидан аз таҷрибаи якдигар, саривақт ошкор намудани қонуншиканиҳо дар соҳаи гумрук, омӯзиши кодекси нави ҳуқуқвайронкунии маъмурӣ, ки аз 1 апрел мавриди амал қарор мегирад ва ба ин васила дар амал татбиқ намудани нақшаву чорабиниҳои сохтори минтақавии Хадамоти гумруки назди Ҳукумати ҶТ дар вилояти Хатлон аст.                  Ҳамчунин қайд гардид, ки бо самараи чунин омӯзишҳо моҳи январи соли ҷорӣ кормандони гумруки Панҷи поён як амали ғайриқонунии ворид гардидани миқдори зиёда аз 30 килограмм маводи нашъадорро ҷилавгирӣ намуданд. Дар дохили халтаҳои семент устокорона ҷойгир намудани халтачаҳои селофании пур аз маводи героин аз назари гумрукчиён пинҳон намонд. Баъд аз ташхиси лабораторӣ маълум карда шуд, ки шаҳрванди Ҷумҳурии Исломии Афғонистон Неъматулло Абдулло мехост зиёда аз 22 килограмм героин ва қариб 8 килограмм афъюнро ба Ҷумҳурии Тоҷикситон ворид созад. Нисбати ин ҳодиса парвандаи ҷиноӣ боз намуда, барои тафтишот ба мақомоти прокуратура ирсол карда шуд.                     Аз рӯи 54 парвандаҳои тартибдодашудаи ҳуқуқувайронкуниҳои гумрукӣ ба маблағи 17 ҳазору 75 сомонӣ ҷарима гузошта, маблағи он ба пуррагӣ ситонида шуда, ба буҷаи мамлакат ирсол карда шуд.Инчунин аз тарафи кормандони раёсати минтақавии гумрукӣ дар вилояти Хатлон ба маблағи 7 ҳазору 500 сомонӣ мол ба нафъи давлат мусодира карда шуд.