ИСТИФОДАИ ТЕХНОЛОГИЯИ НАВИ ТАЪЛИМӢ ДАР ДОНИШГОҲИ ТЕХНОЛОГӢ

                     Душанбе, 4 феврал. АМИТ «Ховар», Людмила Дубинина). — Дар Донишгоҳи технологии Тоҷикистон барномаи нави истифодаи технологияи замонавӣ дар давраи солҳои 2009 — 2011 тартиб дода шуд. Асоси барномаи мазкурро пешниҳодҳо ва тавсияҳои доктори илмҳои омӯзгорӣ, профессор Нуралӣ Шоев ташкил медиҳанд. Барномаи мазкурро вазоратҳои рушди иқтисод ва савдо ва маорифи ҷумҳурӣ тасдиқ намуданд. Дар доираи барнома нақшаи тадбирҳо ва вазифаҳои стратегии рушди фаъолияти донишгоҳ тартиб дода шуд. Дар ин бора муовини ректори донишгоҳ дар масъалаҳои таълиму тарбия Маҳмуд Тошматов дирӯз дар ҷараёни нишасти матбуотӣ сухан ронд.                    Мувофиқи барнома, дар сохтори идораи донишгоҳ ва ҷараёни таълиму тарбия дигаргуниҳои куллӣ ҷорӣ карда мешаванд. Дар заминаи он дар донишгоҳ раёсату шӯъбаҳои истифодаи технологияи нави таълимӣ, маърифатӣ ва иттилоотӣ, идораи ҷараёни таълим ва беҳтар сохтани сифати таълиму тарбия, ҳифзи иҷтимоӣ, равобити берунӣ, таҳқиқоти илмӣ ва ғайра ташкил карда мешаванд.                     Инчунин, дар асоси барнома, дар донишгоҳ маркази технологӣ таъсис дода хоҳад шуд. Дар он шӯъбаҳои таълимии лабораторӣ ва машғулиятҳои тахассусӣ кушода мешаванд, гуфт дар хотима М.Тошматов.