КОНФРОНСИ ИЛМӢ БАХШИДА БА ҶАШНИ МИЛЛИИ ЭРОН ДАР ДОНИШГОҲИ МИЛЛИИ ТОҶИКИСТОН

                   Душанбе, 12 феврал.(АМИТ «Ховар», Марзия Саидова).-Дар Донишгоҳи Миллии Тоҷикистон бахшида ба Рӯзи ҷашни миллӣ ва 30 -умин солгарди Инқилоби исломии Эрон конфронси илмӣ баргузор гардид.                   Чорабинии мазкур бо ибтикори Донишгоҳи Миллии Тоҷикистон дар мусоидат бо Ройзании фарҳангии Сафорати Эрон дар Тоҷикистон ташкил карда шуд. Зимни баромадаш мудири кафедраи таърихи муосири факултаи таърихи Донишгоҳи Миллии Тоҷикистон Темур Муҳиддинов гуфт, ки ин рӯйдоди муҳими таърихӣ дар асоси таълимоти суннатӣ ва худшиносии мардуми Эрон ба вуқӯъ пайваста, дар эъмори ҷомеаи демократӣ заминаи мусоид фароҳам овард.                   Дар конфронс, ки дар он ҳайати устодону донишҷӯёни факултаи таърихи Донишгоҳи Миллӣ иштирок доштанд, Сафири фавқулодда ва мухтори Ҷумҳурии Исломии Эрон дар Тоҷикистон Алиасғари Шеърдӯст, Раиси Ройзании фарҳангии ин кишвар дар Душанбе Қаҳрамон Сулаймонӣ, декани факултаи шарқшиносии Донишгоҳи Миллии Тоҷикистон Умар Сафар, устодони факултаи таърихи донишгоҳи мазкур Қаҳҳори Расулиён, Гавҳар Иброҳимова ва дигарон дар мавзӯҳои аз «Инқилоби машрута то Инқилоби исломӣ», «Сабабҳои ба вуқӯъ пайвастани Инқилоби исломӣ ва пирӯзии он», «Зан ва Инқилоби исломӣ аз нигоҳи Хумейнӣ» ва «Дастовардҳои Эрон дар зарфи се даҳсолаи охир» маърӯза карда, доир ба паҳлӯҳои гуногуни ин рӯйдоди таърихӣ табодули назар намуданд.