КОРГОҲИ НАВИ ДӮЗАНДАГӢ ДАР НОҲИЯИ РАШТ

                Рашт, 12 феврал.(АМИТ «Ховар»,Раъно Нусратуллоева).- Бо ташаббуси Кумитаи кор бо занон ва оилаи назди Ҳукумати Ҷумҳурии Тоҷикистон дар доираи қарори Ҳукумати Ҷумҳурии Тоҷикистон ва Барномаи грантҳои президентӣ барои занҳои соҳибкор коргоҳи нави «Ганҷина» дар деҳаи Навободи ноҳияи Рашт кушода шуд. Ба он соҳибкор Дилафрӯз Хушмаҳмадова роҳбарӣ мекунад. Айни ҳол дар ин ҷо 25 нафар зани хонашин ба кор ҷалб карда шудааст. Дар маросими кушодашавии коргоҳ намояндагони Кумитаи кор бо занон ва оилаи назди Ҳукумати Ҷумҳурии Тоҷикистон иштирок намуданд.                 Дилафрӯз Хушмаҳмадова ба мухбири АМИТ «Ховар» гуфт,ки мо кӯшиш ҳоҳем кард, коргоҳро васеъ намуда, миқдори мошинҳои дарздӯзиро зиёд карда, шумораи коргаронро бештар созем.Оянда барои ҳунаромӯзии духтарони маҳаллӣ мутахассисонро ҷалб менамоем.                Маҳсулоти коргоҳ дар муассисаҳои савдои минтақа ба фурӯш бароварда мешавад. Ин имкон медиҳад,ки шароити зиндагии занон то андозае беҳтар гардад, гуфт Д.Хушмаҳмадова.