«МАГНАТҲО» ВАЗЪИ БӮҲРОНИРО МУШКИЛТАР МЕСОЗАНД

                  Душанбе, 16 феврал. (АМИТ «Ховар», Лаззат Диловарзод).- Бино ба гуфти сухангӯи Вазорати иқтисод ва савдо Ғафурҷони Искодарӣ, 37 фоизи бензин ва дигар намудҳои сӯзишвориро яке аз ширкатҳои калонтарини русии «Зарубежнефт» таъмин мекунад. Ширкатҳои «Нури Дилшод» ва «Газпром»-и Тоҷикистон бошанд , танҳо дар ҳаҷми 10 фоиз аз хориҷи кишвар маводи сӯзишворӣ ва равғанҳои молиданиро ворид карда метавонанд. Умуман дар ҷумҳурӣ 40 ширкати тиҷоратӣ ба воридоти бензин машғуланд.                 -Дар ҷумҳурӣ ғайр аз ширкатҳои дар боло номбаршуда боз 6 «магнат» (сармоядори калон)-е вуҷуд дорад, ки беш аз 51 фоизи сӯзишвориро ба Ҷумҳурии Тоҷикистон ворид месозанд ва танзимкунандаи нархи сӯзишворӣ дар дохили кишвар мебошанд,- мегӯяд иқтисодшинос Ҳоҷимуҳаммад Умаров. Маҳз ҳамин магнатҳо созиши олигополиро ташкил дода, нархро бо хости худашон танзим мекунанд ва вазъи бӯҳрони молиявиро дар ҷумҳурӣ буғранҷтар мегардонанд.