«MOSCOV OPEN-2009»: БА ФАРРУХ АМОНАТОВ 1 ИМТИЁЗ НАРАСИД

               Душанбе, 9 феврал. (АМИТ «Ховар», Пайрав Назаров).-Дар шаҳри Москва ҷашнвораи байналмилалии шоҳмоти «Moscov Open-2009» ба анҷом расид. Шоҳмотбози тоҷик Фаррух Амонатов дар 9 бозӣ 6,5 имтиёз ва аз ғолиби мусобиқа ҳамагӣ 1 имтиёз камтар ба даст овард.               Бад-ин тартиб Фаррух Амонатов дар сабқати «А» дар 5 дидор ғолиб омада, 3 бозиро мусовӣ анҷом дода, танҳо дар як бозӣ мағлуб шуд ва байни 318 нафар ҷои 12-умро касб кард.              Шоҳмотбози Иёлоти Муттаҳидаи Амрико Александр Онишук бо 7,5 имтиёз ғолиби сабқати «А» гардид. Сергей Тивякови ҳолландӣ ва Эрнесто Инаркиеви рус бо 7-имтиёзӣ мутаносибан дар ҷойҳои дуввуму севум қарор гирифтанд.               Маблағи ҷавоизи сабқати «А» 3 миллион рубли русиро ташкил медод, ки аз ҷумла ба ғолиби сабқат 500 ҳазор рубл супурда шуд.                Шоҳмотбози дигари тоҷик Зариф Сафоев дар сабқати «В» дар 9 дидор 5 имтиёз ба даст овард. Вай дар 5 бозӣ пирӯз шуда, дар 4 бозӣ мағлуб гашт ва байни 453 нафар ҷои 195-умро соҳибӣ кард.