МУАРРИФИИ НИЗОМИ ИНТИҚОЛИ МАБЛАҒҲОИ ШИРКАТИ «MONEY GRAM»

                 Душанбе, 6 феврал. (АМИТ «Ховар», Покиза Маҳмадбекова). — Дар бинои марказии ҶСК «Ориёнбонк» муаррифии низоми интиқоли маблағҳои байналхалқии «Money Gram» бо иштироки намояндагони ин ширкат баргузор гардид.                  Ба мухбири АМИТ «Ховар» аз бонки мазкур иттило доданд, ки дар рафти он, масъалаҳои шиносоии амиқ бо ширкати «Money Gram», инчунин хусусиятҳои техникӣ ва роҳҳои воридшавии иттилоот, эҳтимолияти мушкилоти имконпазир ва бартарияти ин намуди низоми интиқоли маблағҳо, инчунин эҳтимолият ва имконоти банақшагирии чорабиниҳои муштарак дар соли ҷорӣ мавриди баҳс қарор гирифтанд.                  Қайд кардан зарур аст, ки байни ҶСК «Ориёнбонк» ва низоми байналхалқии интиқоли маблағҳои фаврии «MoneyGram», дар моҳи июни соли 2008 шартнома ба имзо расида буд, ки мувофиқи ҳисоботи молиявии соли сипаригашта, маблағи воридшуда аз рӯи ин низом 396 миллиону 435 ҳазору 57 доллари ИМА ва маблағи интиқолгардида 35 миллиону 707 ҳазору 25 доллари ИМА-ро ташкил намуданд.