МУЛОҚОТИ САРВАЗИР БО РОҲБАРИ НАМОЯНДАГИИ ХАЗИНАИ БАЙНАЛХАЛҚИИ АСЪОР

                  Душанбе, 11 феврал. (АМИТ «Ховар», Наргис Бояхмедова). — Имрӯз зимни мулоқоти Сарвазири ҷумҳурӣ Оқил Оқилов бо роҳбари намояндагии Хазинаи байналхалқии асъор дар Тоҷикистон Аксел Шиммелпфеннинг масъалаҳои ҳамкорӣ дар соҳаҳои иқтисоду молия муҳокима шуданд. Сарвазир ба мусоҳибаш дар бораи вазъияти имрӯзаи иқтисодию молиявии мамлакат ва нақшаҳои Ҳукумати ҷумҳурӣ барои бартараф сохтан ва пешгирӣ намудани оқибатҳои бӯҳрони молиявӣ маълумот дод. Вай изҳори боварӣ намуд, ки барномаи зиддибӯҳронии Ҳукумати Тоҷикистон бомуваффақият иҷро карда мешавад ва Хазинаи байналхалқии асъор ба ин мусоидат хоҳад кард.                  Роҳбари намояндагии Хазинаи байналхалқии асъор зикр намуд, ки Ҳукумати Тоҷикистон ҳамаи ӯҳдадориҳои ба зимма гирифтаашро иҷро намуд ва Хазинаи байналхалқии асъор бо роҳбарияти Тоҷикистон барномаи нави дастгирии рушди иқтисодӣ ва кам кардани сатҳи камбизоатиро баррасӣ хоҳад кард.