МУСОБИҚАИ ФУТБОЛ БАХШИДА БА ЁДБУДИ РУСТАМ ДОЛТАБОЕВ

                Душанбе, 26 феврал. (АМИТ «Ховар», Пайрав Назаров). — 27 феврал дар Душанбе мусобиқаи дастаҳои беҳтарини футболи мамлакат бо мақсади абадӣ гардонидани хотираи варзишгари машҳури тоҷик Рустам Долтабоев шурӯъ мегардад. Дар он чор даста аз пойтахти мамлакат — дастаҳои футболи «Гвардия», «Регар — Тадаз», «Истиқлол» ва «Энергетик», ду даста аз вилояти Хатлон — дастаҳои «Вахш» ва «Равшан» ва ду даста аз вилояти Суғд — дастаҳои «Эсхата» ва «Спитамен» ширкат меварзанд. Ҳамаи ин дастаҳо ба ду гурӯҳ ҷудо карда шуданд.                Мухбири АМИТ «Ховар» хабар медиҳад, ки 27 феврал дар рӯзи аввали мусобиқа дастаи «Регар — Тадаз» бо дастаи «Энергетик» ва дастаи «Истиқлол» бо дастаи «Гвардия» қувваозмоӣ мекунанд.