ТОҶИКИСТОН ДАР НАМОИШГОҲИ БАЙНАЛХАЛҚИИ КИТОБ ДАР БЕЛОРУСИЯ ШИРКАТ МЕВАРЗА

                 Душанбе, 11 феврал. АМИТ «Ховар», Таҳмина Ғоибназарова). — Имрӯз дар пойтахти Белорусия — шаҳри Минск ярмарка ва намоишгоҳи байналхалқии 16 — уми «Китобҳои Белорусия — 2009» кушода мешавад. Сардори раёсати нашриёту полиграфияи Вазорати фарҳанги ҷумҳурӣ Мирзобадал Бадалов ба мухбири АМИТ «Ховар» хабар дод, ки аз Тоҷикистон дар ин намоишгоҳ бештар аз 150 номгӯӣ китобҳои дар давоми соли 2008 чопкардаи нашриётҳои «Ирфон», «Маориф», «Адиб» ва ғайра пешкаши тамошобинон гардонда мешаванд. Инчунин дар ҷараёни фаъолияти намоишгоҳ маросими муаррифии баёзи чорҷилдаи «Намунаи асарҳои нависандагону шоирони Белорусия» ба забони тоҷикӣ баргузор мегардад. Дар намоишгоҳ асарҳои адибони тоҷик низ пешкаши тамошобинон гардонда мешавад, ки ба забони белорусӣ тарҷума шудаанд.