ВАКИЛОН БА МУҲОКИМАИ ПАРЛУМОНӢ ОМОДАГӢ МЕБИНАНД

                Душанбе, 16 феврал.(АМИТ «Ховар», Марзия Саидова).-16 феврал таҳти раёсати Раиси Маҷлиси намояндагони Маҷлиси Олии ҷумҳурӣ Сайдулло Хайруллоев ҷаласаи навбатии Шӯрои Маҷлиси намояндагон баргузор шуд.                Тавре аз Маркази матбуоти Маҷлиси намояндагон ба АМИТ «Ховар» иттилоъ доданд, дар Шӯро як қатор масъалаҳо, ки ба рушди иқтисодии кишвар,таъмини манфиату баробарҳуқуқии шаҳрвандон муосидат менамоянд, баррасӣ шуданд. Аз ҷумла, лоиҳаи Қонунҳои Ҷумҳурии Тоҷикистон «Дар бораи таърихи қарз» дар қироати дуюм, «Дар бораи донории хун ва ҷузъҳои он», «Дар бораи санадҳои меъёрию ҳуқуқӣ», «Дар бораи стандартҳои иҷтимоии давлатӣ», «Дар бораи захираи давлатӣ», «Дар бораи ҳифзи меҳнат», «Дар бораи ҳадди ақали зиндагӣ», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи хусусигардонии моликияти давлатӣ»-ро баррасӣ карданд. Ҳамчунин, аъзои Шӯро Созишнома оид ба имтиёз ва масуниятҳои Агентии байналмилалии энергияи атомӣ ва масъалаи баргузор намудани муҳокимаи парламентӣ оид ба иҷроиши Буҷети давлатии Ҷумҳурии Тоҷикистон дар соли 2008- ро муҳокима карданд.