ҶАШНИ НАВРӮЗӢ

                  Ҳамадонӣ, 20 март. (АМИТ «Ховар», Сулаймон Холов).- Муовини раиси ноҳияи Мир Саид Алии Ҳамадонӣ дар соҳаи идиология Наргис Муқимова хабар дод, ки 22 март дар боғи фарҳангии ноҳия бахшида ба ҷашни — Наврӯзи ҳуҷастапай ҷамъомади бошукӯҳ баргузор мегардад. Дар он барномаи театрикунонидашудаи шӯъбаи фарҳанги ноҳия намоиш дода мешавад, ки намунаи ҳунарҳои миллӣ, чакандӯзӣ, заргарӣ ва дигар расму оинҳои қадимаро дар бар мегирад. Мавриди зикр аст, ки бахшида ба ин ҷашн аз тарафи Кумитаи ҷавонон, варзиш ва сайёҳии ноҳия мусобиқаҳои варзишӣ гузаронида хоҳад шуд. Ҷамъияти матлубот ва бозори марказии ноҳия ярмаркаи фурӯши маҳсулоти қаннодӣ, нонӣ ва дигар маводи ниёзи мардумро ташкил менамоянд. Инчунин хӯрокҳои миллӣ аз қабили суманак, далда, оши бурида, ширбиринҷ ва дигар навъи таъомҳои миллӣ пешкаши мардум карда мешаванд, гуфт Наргис Муқимова.