ҶОМИ НАВРӮЗ -2009 НАСИБИ КӢ МЕГАРДАД?

                  Душанбе, 20 март.(АМИТ «Ховар», Марзия Саидова).- Дар остонаи ҷашни бостонии Наврӯз Раиси шаҳри Душанбе Маҳмадсаид Убайдуллоев қарор ба имзо расонд. Тибқи он аз ҳисоби маблағҳои озоди буҷаи шаҳр барои дар сатҳи баланд гузаронидани мусобиқаи наврӯзии варзишӣ -гӯштини миллӣ беш аз 30 ҳазор сомонӣ ҷудо карда шуд.                   Тибқи иттилои котиби матбуотии Раиси шаҳр Шавкат Саидов ин маблағҳо барои ба ғолибони мусобиқа харидорӣ намудани тӯҳфаҳо- аз қабили қолину чанггашак, телевизор, маркази мусиқӣ, мавҷгири параболӣ ва ғайраҳо истифода бурда мешавад.                   Ҷоизаи асосии мусобиқаи варзишии гӯштингирӣ -Ҷоми Наврӯз 2009 буда, арзиши он 1100 сомониро ташкил медиҳад. Бояд тазаккур дод, ки мусобиқаи варзишии гӯштини миллӣ рӯзи 22 март соати 14 дар Варзишгоҳи марказии ҷумҳурӣ гузаронида шуда, дар он аз тамоти минтақаҳои ҷумҳурӣ гӯштингирони номӣ даъват шудаанд.