«БАРҚИ ТОҶИК» НА БАРҚ МЕДИҲАДУ НА ҚАРЗАШРО

                     Душанбе, 27 март. (АМИТ «Ховар», Лаззат Диловарзод).- Бино ба иттилои намояндаи ширкати «Интер РАО» Борис Зверев, масъулини ширкати мазкур ҳамаи аснодро омода кардаанд то ширкати «Барқи тоҷик»-ро ба суд диҳанд. Бино ба иттилои ҳамин манбаъ, бо сабаби пардохт накардани қарзе, ки ширкати «Барқи тоҷик» аз фурӯши барқи нерӯгоҳи «Сангтӯда-1» бадаст овардааст, то имрӯз маоши коргарони ин иншооти зарурӣ пардохт нагардидааст.                     Тибқи созишнома миёни Ҷумҳури Тоҷикистон ва Федератсияи Россия агрегати чоруми ин нерӯгоҳ дар ибтидои соли ҷорӣ бояд мавриди баҳрабардорӣ қарор мегирифт, аммо бо сабаби аз ибтидои кори агрегати якум то имрӯз напардохтани маблағи нерӯи барқи истифодашаванда, ки ба 10 млн. доллар расидааст, ширкати «Интер РАО» сохтмон ва ба истифода додани агрегати чорумро бо камбуди молиявӣ ба таъхир андохт. Бино ба гуфти масъулини ширкати «Барқи тоҷик» миёни ҳар ду ширкат мувофиқа ҳосил шудааст, ки агрегати чорум то охири моҳи апрел ба истифода дода шавад.