БАРРАСИИ ПРОБЛЕМАҲОИ БӮҲРОНИ ҶАҲОНИИ ИҚТИСОДӢ ДАР ОСТ

                   Душанбе, 20 март. (АМИТ «Ховар», Людмила Дубинина). — Ҳайати Тоҷикистон, ки дар анҷумани дуюми иқтисодӣ дар пойтахти Ҷумҳурии Қазоқистон — шаҳри Остона иштирок дошт, ба Душанбе баргашт. Дар анҷуман масъалаи «Таъмини амнияти иқтисодии мамлакатҳои Евразия дар давраи бӯҳрони ҷаҳонии молиявӣ» муҳокима карда шуд. Яке аз иштирокчиёни анҷуман, муовини директори Маркази тадқиқоти стратегии назди Президенти Тоҷикистон Олимҷон Бобокалонов ба мухбири АМИТ «Ховар» хабар дод, ки дар анҷуман намояндагони 59 мамлакати ҷаҳон иштирок доштанд. Дар он проблемаҳои муҳим, аз ҷумла, сабабҳо ва моҳияти бӯҳрони ҷаҳонии молиявӣ, имконияти бартараф сохтани оқибатҳои он ва андешидани тадбирҳои зарурӣ дар мамлакатҳои минтақа муҳокима шуданд. Аз Тоҷикистон дар ин ҷамъомад директори Пажӯҳишгоҳи таҳқиқоти иқтисодии Вазорати рушди иқтисод ва тиҷорат Нуриддин Қаюмов ва муовини раиси Донишкадаи такмили маҳорати хизматчиёни давлатӣ Ҳалимхон Нуриддинов низ ширкат варзиданд.