ДАЪВАТИ ПРЕЗИДЕНТИ ҚАЗОҚИСТОН

                    Душанбе, 18 март. (АМИТ «Ховар», Наргис Бояхмедова). — Сафири Қазоқистон дар Тоҷикистон Абӯтолиб Аҳмадов имрӯз барои кормандони воситаҳои ахбори оммавии Тоҷикистон нишасти матбуотӣ ташкил намуд. Вай зимни сӯҳбат бо хабарнигорон дар бораи паёми нави президенти Қазоқистон ба халқи кишвар сухан ронд. Қайд карда шуд, ки ҳадафи паёми Президент пешгирии оқибатҳои ногувори бӯҳрони ҷаҳонии молиявӣ мебошад. Президент халқи мамлакатро даъват намуд, ки барои бартараф сохтани оқибатҳои бӯҳрон ва гузоштани замина бо мақсади пешрафти иқтисодиёт муттаҳид гарданд, гуфт А.Аҳмадов.                      Қайд карда шуд, ки сардори давлат бо ин мақсад силсилаи тадбирҳои иқтисодиро пешниҳод намуд. Бо мақсади пешгирии зиёни бӯҳрон ва таъмини вазъи мӯътадили иқтисодиёт зиёда аз 2 триллиону 700 миллиард танга ҷудо карда шуд. Ин маблағ пеш аз ҳама барои таъмини фаъолияти мӯътадили бонкҳо, сохтмони манзил, тиҷорати хурду миёна ва соҳаи кишоварзию саноатӣ истифода бурда мешавад. Н.Назарбоев изҳор намуд, ки дар Қазоқистон бо вуҷуди таъсири калони бӯҳрони молиявӣ маблағи нафақа, маоши кормандони корхонаҳои соҳаи буҷетӣ ва стипендияи донишҷӯён зиёд карда хоҳад шуд. Илова бар ин дар мамлакат сохтмони боғчаҳои бачагона, мактабҳо ва муассисаҳои тиббӣ давом дода мешавад. Аз рӯи маълумоти расмӣ айни ҳол дар Қазоқистон шумораи бекорон ба 600 ҳазор нафар мерасад. Бо вуҷуди ин дар соҳаҳои таъминоти обу гармӣ ва энергетика мутахассисон намерасанд. Ҳукумат барои бозомӯзии кадрҳо дар давоми солҳои оянда 140 миллиард танга ҷудо менамояд.                       Сафири Қазоқистон Абӯтолиб Аҳмадов изҳори боварӣ намуд, ки давлату ҳукумат ва халқи мамлакаташ оқибатҳои бӯҳрони ҷаҳонии молиявиро бомуваффақият бартараф хоҳанд намуд.