ДАВРИ АВВАЛИ МАҲФИЛИ ЗАРИФОН «МАҲЗАР» ОҒОЗ МЕЁБАД

                  Душанбе, 5 март.(АМИТ «Ховар», Лутфия Эшонқулова).- Дар арафаи иди бонувон, 7 март дар Маркази фарҳангии ҷавонони Тоҷикистон «Ориёно», даври аввали озмуни маҳфили телевизионии зарифон «Маҳзар» оғоз меёбад. Маҳфил бо дастгирии Вазорати фарҳанги Ҷумҳурии Тоҷикистон, Кумитаи телевизион ва радиои назди Ҳукумати ҶТ ва Кумитаи кор бо ҷавонон, варзиш ва сайёҳии назди Ҳукумати ҶТ гузаронида мешавад                 Тавре ба мухбири АМИТ «Ховар» дар Кумитаи кор бо ҷавонон, варзиш ва сайёҳӣ хабар доданд, дар озмун донишҷӯёни макотиби олии пойтахт иштирок менамоянд. Мувофиқи қуррапартоӣ дар даври аввали озмун  Донишгоҳи давлатии омӯзгории Тоҷикистон ва Донишгоҳи техникии Тоҷикистон қувваозмоӣ менамоянд. Шартҳои озмун аз саломнома, саҳначаи ҳаҷвӣ, суруди ҳаҷвӣ ва тақлид иборатанд.                  Ғолибони ин маҳфил ба даври дуюми он роҳхат мегиранд.