ГУРӮҲИ КОРИИ ШАБАКАИ АВВАЛИ ТЕЛЕВИЗИОНИ РУСИЯ БА ДУШАНБЕ ОМАД

                     Душанбе, 25 март. (АМИТ «Ховар», Таҳмина Ғоибназарова). — Гурӯҳи кории Шабакаи аввали телевизиони Русия барои ҳаллу фасли масъалаҳои гузаронидани озмуни байналхалқии овозхонони ҷавон таҳти унвони «Панҷ ситораи интервизион» 23 март ба Душанбе омад. Ба ҳайати мазкур 11 нафар, аз ҷумла, директори генералии озмун Н.Смариго, мудири барномаҳои мусиқии Шабакаи аввал Ю.Оқсюта ва дигарон шомиланд. Меҳмонон дар давоми чор рӯз шартҳои гузаронидани озмунро бо намояндагони вазорати фарҳанг ва Кумитаи телевизион ва радио муҳокима ва мувофиқа хоҳанд кард.                    Аъзои гурӯҳи корӣ 24 март бо мауовини сарвазир Р.Қурбонова мулоқот кард. Сипас мулоқоти онҳо бо роҳбарону намояндагони Кумитаи телевизион ва радио баргузор гардид. Меҳмонон ҳамчунин дар тантанаҳои иди Наврӯз ширкат варзиданд.                     Шахсони мутасаддии ҳар ду ҷониб 25 март масъалаи интихоби ҷойи гузаронидани озмунро баррасӣ менамоянд. 26 март масъалаҳои марбут ба ороиши саҳна, иштирокчиёни озмун, пахши консерт ва фурӯши чиптаҳо ҳал карда мешавад.